Yohanes 4

Hyang Yesus Mabligbagan Sareng Anak Istri Saking Samaria

Risedek Hyang Yesus ngajahin ring Wawidangan Yudea, irika para mirengin indik Hyang Yesus nerima lan pengiring sane akehan kapining dane Yohanes. 2 Sujatine nenten ja Hyang Yesus sane ngicen penglukatan, nanging para sisian Idane. 3 Tur ritatkala Hyang Yesus tangeh wantah para Parisine uning paindikane punika, Hyang Yesus sareng sisian Idane matilar saking Yudea tur luas mawali ka Wawidangan Galilea.

4 Pamargine sane nuju Galileane punika musti ngliwatin Wawidangan Samaria. 5 Risedek ngentasin Samaria, Hyang Yesus rauh ring Kota Sikar. Kotane punika nenten ja adoh saking tanah druen leluhur anak Yahudine sane mapesengan dane Yakub. Tanahe punika dados warisan sane katerima olih dane Yusup, okan dane Yakub. 6 Irika wenten sumur druen dane Yakub idumun. Krana Hyang Yesus leleh saking pamargin Idane, Ida malinggih ring sumure punika. Duk punika sawetara jam roras tengai.

7-8 Ritatkala para sisian Hyang Yesuse luas ka kota jagi numbas ajengan, raris rauh anak istri saking Samaria jagi nimba toya. Hyang Yesus raris ngandika ring anake istri punika sapuniki, “Dadoske Tiang nunas toya mangda inum Tiang?”

9 Anak istri punika nyaurin sapuniki, “Boyake jerone anak Yahudi, lan titiang anak Samaria; punapike jerone nunas inuman ring dewek titiange?” Anak Yahudi nenten macapatan sareng anak Samariane.

10 Raris Hyang Yesus ngandika sapuniki, “Ragane nenten uning sekadi napike wara nugraha saking Sang Hyang Pengardi kapining i manusa lan sirake Tiang puniki sane nunas inuman kapining ragane. Yening ragane uning paindikane punika, pastika ragane nunas inuman kapining Tiang. Turmaning Tiang jagi ngicen ragane toya urip.”

11 Anake istri punika matur sapuniki, “Jerone nenten madue timba, lan sumure puniki kalintang dalem. Dijake jerone polih toya urip punika? 12 Dane Yakub leluhur iragane, ngicen sumure puniki kapining iraga. Tur dane ngambil toya iriki sane kainum sareng okan-okan danene, kenten pada ingon-ingon danene. Napike jerone ngrasa agengan kapining dane Yakub?”

13 Raris Hyang Yesus nyaurin sapuniki, “Sirake sane nginum toyan sumure niki jagi bedak malih. 14 Sakewala sira ja nginum toya sane jagi icen Tiang, anake punika nenten ja jagi bedak malih kantos salamin-laminne. Krana toyane sane kicenin Tiang punika sekadi toya klebutan ring uripnyane. Toyane punika jagi ngicen urip sujati salamin-laminne.”

15 Raris anak istri punika matur sapuniki, “Jero, icen ja titiang toyane punika, mangda titiang nenten bedak malih lan nenten musti malih mriki ngambil toya.”

16 Hyang Yesus ngandika sapuniki, “Mrika ja, nikain rabin ragane tur ajak ja mriki.”

17 Anak istri punika nyaurin sapuniki, “Titiang nenten madue kurenan.”

Raris Hyang Yesus ngandika malih, “Baos ragane punika patut. 18 Sujatine ragane sampun ping lima marabian, tur anake lanang sane urip sareng ragane mangkin boya ja rabin ragane. Baos ragane punika yakti patut.”

19 Anake istri punika matur sapuniki, “Jero, sane mangkin titiang tatas uning jerone puniki Sinoman Sang Hyang Pengardi. 20 Leluhur titiange mabakti kapining Sang Hyang Pengardi ring gununge puniki, nanging Bangsa Yahudine ngamaosang wantah ring Kota Yerusalem kamanten genah anake mabakti.”

21 Raris Hyang Yesus ngandika sapuniki, “Wih ibu, pracaya ja kapining pengandikan Tiange! Galah puniki jagi rauh: anake jagi mabakti kapining Sang Hyang Aji nenten ja ring gununge puniki lan nenten ja ring Kota Yerusalem. 22 Ragane anak Samaria mabakti kapining Sang Hyang Pengardi, nanging ragane nenten ja uning Ida. Tiang sami anak Yahudi mabakti kapining Sang Hyang Pengardi, lan Tiang uning Ida, krana Sang Hyang Pengardi jagi ngrahayuang manusane malantaran adiri saking anak Yahudi. 23 Nanging galahe jagi rauh, sujatine sampun rauh mangkin: penyungsung sane sujati jagi mabakti kapining Sang Hyang Aji saking kenehnyane sane sampun nerima napi sane patut saking Ida. Krana Ida mikayunang penyungsung sane sujati sekadi punika. 24 Sang Hyang Pengardi wantah Roh. Anake sane dados penyungsung sane sujati musti mabakti kapining Sang Hyang Aji saking manahnyane sane sampun nerima napi sane patut saking Ida.”

25 Anake istri punika matur sapuniki, “Titiang uning Sang Prabu Sane Kajanjiang olih Sang Hyang Pengardi punika jagi rauh. Ritatkala Ida rauh, Ida jagi midartayang saluirin paindikane saking Sang Hyang Pengardi kapining tiang sami.” Sang Prabu Sane Kajanjiang punika taler kaucap ‘Kristus’.

26 Raris Hyang Yesus ngandika sapuniki, “Tiang sane sedek ngandika kapining ragane wantah Sang Prabu Sane Kajanjiang punika.”

27 Duk punika para sisian Hyang Yesus mawali saking kota. Ipun sami ngon santukan Hyang Yesus mawicara sareng anak istri. Nanging ipun sami nenten kayun mataken ring Ida sapuniki, “Napi sane perluang guru?” utawi “Napi mawinan guru mabligbagan sareng anak istri punika?”

28 Raris anak istri punika ngalain junnyane ring sumure punika tur malaib ka kota nyeritayang ring anake irika sapuniki, 29 “Mriki ja cingakin anake sane midartayang ring dewek tiange saluirin paindikan sane laksanayang tiang. Punapi manut jerone sami? Napike anake punika wantah Sang Prabu Sane Kajanjiang olih Sang Hyang Pengardi?” 30 Raris anake akeh saking kotane punika rauh nyingakin Hyang Yesus.

31 Duk punika para sisian Hyang Yesus melid matur sapuniki, “Guru, ngiring ja ngajeng.”

32 Nanging Hyang Yesus nyaurin sapuniki, “Tiang ngelah dadaaran ane ragane tusing nawang.”

33 Raris para sisian Idane saling takenang, “Adake anak len ane ngaturang ajengan kapining Guru?”

34 Hyang Yesus ngandika sapuniki, “Dadaaran Tiange tuah nglaksanayang pikayunan Sang Hyang Aji sane ngutus Tiang. Dadaarane ento sing ada len mragatang tugas sane kaprentah olih Ida. 35 Buka sasonggane, ‘Sebilang petang bulan masan manyine.’ Nanging Tiang ngorahang tekening ragane: Tingalin ja padi-padine suba kuning, sadya bakal kaanyi! 36 Anake ane manyi suba maan upahne lan ipun pada munduhang asil manyine. Asil manyine ento tuah anak lenan ane maan idup sujati salamin-laminne. Ento mawinan anake ane nyambehang bibit lan anake ane manyi, bareng-bareng masukarena. 37 Sujatine sasonggane ene beneh, ‘Ane aukud nanem, ane len manyi.’ 38 Tiang nunden ragane makejang luas manyi di tegale ane ragane tusing ngarap; anake len suba magarapan ditu, tur ragane manyi uling garapan anake ento.”

39 Kaceritayang mangkin, akeh warga Kota Samariane pracaya ring Hyang Yesus krana anak istri punika nyeritayang sapuniki, “Gurune punika nyeritayang kapining tiang saluirin paindikane sane laksanayang tiang.” 40 Punika mawinan ritatkala warga Samariane punika kacunduk sareng Hyang Yesus, ipun makasami mapinunas banget mangda Ida meneng ring kotane punika. Raris Hyang Yesus meneng irika kalih rahina. 41 Lan krana pengajahan Idane, ngancan ngakehang anak Samariane pracaya ring Ida. 42 Raris ipun sami ngraos kapining anake istri punika sapuniki, “Dumun tiang makasami pracaya krana tutur ragane kamanten. Nanging mangkin tiang makasami pracaya krana tiang sampun mirengin Guru lan uning Guru wantah juru jagate sane sujati.”

Hyang Yesus Nyegerin Okan Pegawe Pemrentah

43 Sasampune Hyang Yesus meneng kalih dina ring Kota Sikar, Ida raris luas ka Wawidangan Galilea. 44 Hyang Yesus praragan sampun ngandika indik asal Idane sekadi puniki, “Nenten wenten sinoman Sang Hyang Pengardi sane kaajiang ring negeri asalnyane.” 45 Nanging ritatkala Hyang Yesus rauh ring Galilea, anake irika nyambut Ida antuk manah sane seneng. Ipun sami nyingakin napi sane kakaryanin olih Hyang Yesus ring Kota Yerusalem krana ipun pada sareng-sareng irika duk rarainan Paskah.

46 Kaceritayang Hyang Yesus mawali ka Kota Kana ring Galilea, genah Ida ngubah toya dados anggur. Kotane punika nenten adoh saking Kota Kapernaum. Ring Kapernaum, wenten adiri okan pegawe pemrentah sane sedek sungkan. 47 Pegawene punika mirengin yening Hyang Yesus sampun rauh saking Yudea mawali ka Galilea. Raris ipun ngrereh Hyang Yesus tur nunas mangda Ida rauh ka Kapernaum nyegerin okannyane sane das padem. 48 Hyang Yesus ngandika kapining pegawene punika sapuniki, “Yening jerone sami nenten nyingakin praciri lan paindikan sane ngangobin, jerone pastika nenten jagi pracaya.”

49 Pegawene punika matur sapuniki, “Ratu, gelis-gelis ja rauh sadereng pianak titiange padem.”

50 Hyang Yesus ngandika sapuniki, “Mrika ja budal! Okan jerone sampun seger.”

Pegawene punika pracaya kapining pengandikan Hyang Yesuse, raris ipun budal. 51 Ring tengahin margine, para pengayah pegawene punika rauh tur matur sapuniki, “Okan jerone sampun seger.”

52 Raris pegawene punika mataken ring pengayahe jam kuda okannyane seger. Tur pengayahe masaur sapuniki, “Dugas dibi, sawetara jam siki tengaine, sungkan panesne ical.” 53 Irika raris pegawene punika inget yening dugase punika Hyang Yesus ngandika, “Okan jerone sampun seger.” Irika, pegawene punika miwah saluirin anake sane wenten ring jeronnyane pracaya kapining Hyang Yesus.

54 Sekadi punika paindikan ngangobin sane kaping kalih sane kakaryanin olih Hyang Yesus. Ida nglaksanayang paindikane punika sasampune mawali saking Yudea nuju Galilea.

Penuntun mabligbagan ring pasamuan:

1. Ngaturang penyuksma.

“Ngiring ja iraga ngaturang suksma mangkin. Semeton jagi ngaturang suksma indik napi?”

2. Ceritayang ja pakeweh semetone suang-suang raris iraga saling tunas icayang.

“Napike semeton wenten pakeweh mangkin?”

3. Ngwacen utawi mirengin paplajahane puniki.

4. Saurin ja pitakenne puniki:

“Napi sane plajahin iraga indik Sang Hyang Tunggal ring ceritane puniki?”

“Napi sane plajahin iraga indik manusa saking ceritane puniki?”

“Sekadi napike sapatutne iraga nyalanang idup manut pengajahane puniki?”

“Kapining sirake sapatutne iraga nyeritayang malih ceritane puniki?”